SA makausa pa, ang higanting Sugboanon nga si June Mar Fajardo nakakulit na usab og kasaysayan sa Philippine Basketball Association (PBA) human nga sa ikalimang sunodsunod nga season nasungkit na ang iyang ikalimang most valuable player (MVP) award.

Ang pasidungog gipahigayon kagahapon atol sa Leo Awards didto sa Philippine Arena nga gitukma usab sa pagsugod sa ika-44 nga season sa PBA.

Naapsan ni Fajardo sila si Purefoods star Alvin Patrimonio ug Mon Fernandez sa pinakadaghan og MVP trophies. Record na usab kini nga natala sa PBA nga pinakadaghan og MVP sa sagunson nga katuigan.

Ang sentro sa San Miguel nag-averaged og 20.6 puntos, 12.4 rebounds ug 1.2 blocks sa Season 43.

Siya adunay sumada nga 2,436 puntos diin iyang nalupig si Stanley Pringle sa NorthPort, nga may 2,041 points.

Midaog siya sa media votes (777), ug sa PBA votes (300), samtang mitali usab siya sa statistical points og 1,032 ug 327 sa player votes.

Si Pringle ang naglabaw sa statistical points nga may 1,107, sa player votes (395), ug nakakuha og 389 sa media votes ug 150 sa PBA votes.

Uban ni Fajardo nga milangkob sa mythical team sila si Pringle, Paul Lee sa Magnolia, Japeth Aguilar sa Ginebra ug Marcio Lassiter sa San Miguel.

Sila si Scottie Thompson sa Barangay Ginebra, Mark Barroca sa Magnolia, Arwind Santos sa San Miguel, Poy Erram sa Blackwater ug Matthew Wright sa Phoenix mao usab ang nalakip sa second Mythical Team.

Si Jason Perkins sa Phoenix ang milupig ni Jeron Teng sa Alaska sa Rookie of the Year award, si Gabe Norwood sa Rain or Shine ang miangkon sa Sportsmanship Award ug si Thompson ang nakakuha sa Most Improve Player.

Sila si Norwood, Fajardo, Rafi Reavis sa Magnolia, Rome Dela Rosa sa Magnolia ug Chris Ross sa San Miguel ang milangkob usab sa All-Defensive Team. (JBM)