Bisan pa sa hulga sa Games and Amusement Board (GAB), ipadayon gyud sa Filbasket ang pagsugod sa ilang tournament karong Oktubre 28, 2021.

Kini maoy gibutyag sa founder sa lega nga si Jai Reyes kinsa nipasabot nga aduna nay koordinasyon sa mga hingtungdan ahensiya aron sigurong mapasunod ang seguridad sa kinatibuk-ang lega ilabi na atol sa inaugural season nga gikatakda didto sa Subic, Zambales.

Niadtong Biyernes sa niaging semana, ang GAB nihulga nga mohimo og legal action batok sa Filbasket kon mamugos gyud kini sa ilang kompetisyon

bisan og wala kini pagtugot gikan mismo sa GAB, Philippine Sports Commission ug Department of Health - ang mga ahensiya nga maoy naglangkob sa Joint Administrative Order (JAO) sa IATF nga maoy mo-surpervise kon unsaon pagpahigayon ang mga sports atol ning pandemya.

Apan matod ni Reyes nga ang lega nakompleto na sa mga rekisitos sa Memorandum Circular No. 2021-0011 sa DOH nga maoy gitahasan sa pagmugna og mga lagda alang sa pagpahigayon og sports events nga dili ubos sa hurisdiksiyon sa GAB ug sa PSC.

Walay hurisdiksiyon ang GAB ug PSC sa Filbasket sanglit dili man kini professional league.

Sa maong sitwasyon, ang DOH nagpasabot nga ang supervision sa maong event pagadumalahon sa local government unit (LGU).

Ang Filbasket, matod pa ni Reyes, nakakuha na og pagtugot sa Subic Bay Metropolitan Authority (SMBA) ug sa Regional Inter-Agency Task Force sa Central Luzon. (JBM)