HUMAN sa duha ka sunodsunod nga dili maayong panghitabo sa iyang kinabuhi, nakadesisyon si Floyd Mayweather Jr. nga dili una ipadayon iyang planong mobalik og away karong tuiga.

Ning bag-uhay lang, nipanaw ang uyoan ug sa samang higayon trainer ni Mayweather nga si Roger Mayweather gumikan sa sakit nga diabetes.

Nahitabo usa ka semana human nakit-ang patay ang kanhi uyab ni Mayweather nga si Josie Harris sulod sa sakyanan niini sa gawas lang sa iyang panimalay sa Valencia, California.

Si Harris, 40, maoy inahan sa tulo sa upat ka mga anak ni Mayweather.

Sa sayo pa, gipabuhagay nang daan ni Mayweather nga nagplano siyang molugnot gikan sa pagretiro ug moaway sulod sa duha ka mga higayon karong tuiga diin posible ang usa niini mao ang gikaintapang rematch batok kang Filipino boxing icon Manny Pacquiao.

Gawas kang Pacquiao, posible sab unta nga makig-rematch si Mayweather kang mixed martial arts (MMA) superstar Conor McGregor.

Sila si Pacquiao ug McGregor parehong gipanglupig ni Mayweather Jr., kinsa miretiro nga wa'y pilde sulod sa 50 ka mga away. (ESL)