Gipakita ni Floyd Mayweather Jr. nga aduna gihapon siya’y saktong abilidad bisan taodtaod na siyang miretiro sa iyang pagbukbok ni Don Moore kagahapon sa ilang exhibition fight sa Etihad Arena sa Abu Dhabi.

Si Mayweather, 45, kinsa miretiro niadtong 2017 nga wala’y pilde sulod sa 50 ka mga away, mipakita sa iyang kahanas sa tibuok 8-round nga away.

Naila man tuod si Mayweather sa iyang pagkamaayong modepensa apan ning awaya, siya ang mas agresibo.

Si Moore, kinsa adunay 18-0-1, 12KOs nga rekord ug kanhi sparmate ni Mayweather, misuway pag-alkontra sa mga ataki ni Mayweather apan tataw nga wala siya’y dag-anan.

Gumikan kay usa lang kini ka exhibition fight, wala’y gideklarar nga mananaog.