NAGTINGUHA og knockout nga kadaugan si ONE lightweight world champion Filipino Eduard Folayang sa iyang pagpakigbatok kang Japanese Shinya Aoki karong Marso 31 sa main event sa ONE: A New Era sa Ryogoku Kokugikan sa Tokyo.

Si Folayang, kinsa maoy labing bantugang mixed martial arts (MMA) fighter sa Pilipinas, nipadayag sa iyang respeto sa abilidad ni Aoki.

Hinuon alang sa Team Lakay superstar nga kaya niyang lupigon og balik si Aoki, kinsa iyang gi-TKO sa premiro nilang away niadtong 2016.

Apan gitataw ni Folayang, kinsa lumad nga taga Baguio City, nga bisan gamay, dili siya mokompiyansa kang Aoki, kinsa iyang gihulagway nga usa sa labing maayong fighterss sa iyang timbang.

Si Aoki, kinsa usa ka MMA legend sa Japan, nabantog sa iyang world class grappling.

Sa iyang 42 ka mga daog, 26 niini ang pinaagi sa grappling.

Nagkanayon si Folayang nga ang abilidad ni Aoki sa grappling mao ang iyang gipangandaman og maayo. (ESL)