'Gamay apan sakit'
“Gamay apan sakit. Salto sab kaayo.”
Kini maoy sagad mahulagway ngadto ni Gileant Delator, ang pointguard sa KCS Computer Specialists-Mandaue City, ang unang kampiyon sa bag-ong natukod nga Pilipinas VisMin Super Cup Visayas leg.
Sa gitas-on nga 5-5 nga may pagkanipis apan bingkol ang lawas, si Delator maoy perming masentro sa atraksiyon sa matag duwa hilabi na sa dagkong mga lega.
Sa bag-ong natapos nga VisMin Cup, ang bag-ong professional basketball league sa nasod nga gipahigayon sa Civic Center sa lungsod sa Alcantara, Cebu, ang 26-anyos nga kanhi sakop sa Sangguniang Kabataan sa Barangay Pondol, lungsod sa Balamban, nakapamatuod nga dili diay ang gitas-on ug gidak-on maoy perming mopatigbabaw sa basketball.
Sa deciding Game 3 sa finals series batok sa powerhouse nga MJAS Zenith-Talisay City, sa wala damha, si Delator nahimong usa sa mahait nga hinagiban aron ituboy ang KCS ngadto sa wala damha nilang kampiyonato.
Walo ka sunodsunod niyang puntos sa fourth quarter maoy usa sa nagwanang sa ilang agianan paingon ngadto sa kadaugan.
“Pasalamat mi sa Kahitas-an kay gihatagan mi niya ani panahon sa pandemic. Way kabutangan sa kalipay ang among gibati labi na kay pioneer mi ani nga leg,” ni Delator pa.
Gikonsiderar ni Delator nga nagsilbi usab kining bawos sa iyang kalisod ug kapait nga nasinati panahon sa pandemic sa wala pa ang VisMin Cup.
Iyang gibutyag nga aron lang makakita og ginagmayng income nga magamit sa ilang pamilya, mokuyog siya sa panagat.
“Ako ra gyud gibuhat sulod sa pandemic kuyog ra gyud kog pangisdaan para maka-income lang bisag gamay,” asoy ni Delator.
