Sagubangon na sa batan-ong puwersa sa Gilas Pilipinas ang labing una nilang tahas sa second window sa Fiba Asia Cup 2021 qualifiers sugod karong alas 9:00 sa gabii batok sa host Thailand squad.

Sukwahi sa naandan, ang Gilas wala nakakuha og dekalidad nga mga magduduwa sa Philippine Basketball Association (PBA) gumikan sa mga kahasol nga hatod sa coronavirus disease 2019 (Covid-19).

Hinuon bisan mga bata-on ang modala sa Gilas ning higayuna, gilauman nga makasukol gihapon kini og insakto.

“They play hard. They have energy. They have intensity. If they can translate all of those to the cerebral part of the game, then they’re the perfect bunch already,” matod ni Gilas coach Jong Uichico.

Ang produkto sa University of the Visayas (UV) Green Lancers nga si Rey Suerte nahilakip sa mga labing sinaligan sa Gilas.

Karong Lunes, Nobiyembre 30, 2020, makigsangka og balik ang Gilas sa Thailand alang katapusan nilang tahas sa 2nd window. / ESL