Nasugamak ang Gilas Pilipinas sa 68-80 nga kapildihan batok sa African powerhouse Tunisia nga maoy nagpahagba sa mga Pinoy sa ikaupat nga puwesto sa pagtiklop sa King Abdullah Cup niadtong Dominggo sa gabii, Agusto 1, 2021 (RP time) sa Prince Hamza Hall sa Amman, Jordan.

Ang Gilas ningkombati nga wala ang ilang naturalized player nga si Ange Kouame nga maoy tataw nga hinungdan nga naglisod sila pag-alkontra sa mga pambato sa Tunisia sa ilawom nga sila si Jawher Jawadi ug Omar Abada.

Si Jawadi nagpakatap og 21 puntos samtang niamot og 19 puntos si Abada aron hingpiton ang panimalos sa Tunisians ngadto sa mga Pinoy, nga ningpakaging kanila sa preliminary round, 74-73, pinaagi sa overtime.

Kini maoy ikatulong sunodsunod nga duwa nga kinahanglang mobangon ang Gilas gikan sa pagkalubong apan wala sila nakalahutay sa hinapos nga bahin.

Gikan sa 48-64 nga biya, ang Gilas ninggukod hangtod nga napahak nila ang labaw sa Tunisia ngadto sa 69-66 sa nahabiling 4:22 minutos.

Human niini, nagkumboya sila si Abada ug Jawadi aron pukawon og balik ang nahinanok nga opensa sa Tunisia.

Ang Gilas gipangulohan ni Carl Tamayo pinaagi sa iyang 14 puntos samtang niamot og 12 puntos si SJ Belangel.

Puntos matag usa:

Tunisia (80) - Jawadi 21, Abada 19, Ghayaza 9, Lahiani 9, Gannouni 8, Bouallegue 6, Marnaoui 2, Addami 2, Yahia 2, Chihi 2.

Gilas Pilipinas (68) - Tamayo 14, Belangel 12, Go 9, Ramos 7, Baltazar 6, Ravena 6, Suerte 6, Ma. Nieto 3, Abarrientos 3, Ildefonso 2, Navarro 0, Chiu 0, Heading 0, Mi. Nieto 0. Quarterscores: 23-18; 42-34; 64-53; 80-68. (ESL)