HUMAN sa ilang dominanting kadaugan sa miaging semana batok sa Thailand, tuyo karon sa Gilas Pilipinas nga lupigon napud pag-usab ang maong nasod karong Lunes sa uwahing adlaw sa Window 2 sa FIBA Asia Cup qualifiers sulod sa bubble didto sa Manama, Bahrain.

Ang national team milupig sa Thailand, 93-61, sa una nilang panag-abot niadtong Biyernes.

Ang 6-foot-4 Dwight Ramos maoy nangulo sa national team sa iyang 20 puntos, pito ka rebounds, tulo ka assists ug tulo pud ka steals, samtang si Juan Gomes de Liano ug Justin Baltazar mitunol og 12 puntos matag-usa.

Ang maong kadaugan mibutang sa Pilipinas ngadto sa ibabaw sa Group A kauban ang South Korea, kinsa wala mosalmot sa Manama, Bahrain window tungod sa hulga sa Covid-19. Ang national team adunay 15 ka players nga gidala sa Bahrain.

Sa ilang unang duwa batok sa Thailand, mipakita og maayong labok ang national team pinaagi sa pagpugong sa Thailand ngadto sa 19-of-64 shooting. (RSC)