NAGBANGIS si Justine Brownlee aron panguluhan ang Brgy. Ginebra ug pupoon ang ilang unang kadaogan batok sa Rain or Shine, 102-89 atol sa Game 1 sa ilang best-of-five semi-finals series sa PBA Commisioner’s Cup.

Si Brownlee hapit nakakuha og triple-double atol sa maong dula human mitunol og 35 points, 14 rebounds, 9 assist, duha ka steals ug four blocks para sa Kings.

Dako sab og natunol si Jeff Chan, kinsay nagpakita og impresibo nga dula batok sa iyang kanhi-kuponan ug midungag og 21 puntos sulod sa 21 ka minutos.

Sa sayong bahin sa dula, daling mitali ang Kings og 15-2 run para sa ilang 20-7 nga score.

Si Reggie Johnson mipabuhagay og 30 puntos ug 13 ka rebounds samtang mitunol sab si James Yap og 15 puntos ug walo ka rebounds para sa Elastopainters.

Si Greg Slaughter mitunol og 20 puntos samtang si Joe Devance mihatag og 12 puntos para sa Kings nga midula nga wala si Japhet Aguillar human makahiagum og Achilles injury atol sa ilang dula sa quarter-finals batok sa Meralco Bolts.

Ang Game 2 dulaon karung adlawa didto sa Smart-Araneta Coliseum. (Jude Suhot)