MGA duwa karon:

4:30 pm. - Meralco vs. Columbia Dyip

7:00 pm. - Ginebra vs. Blackwater

Sugdan na karong gabii pagdepensa sa Barangay Ginebra ang ilang titulo sa PBA Commissioner’s Cup sa dihang ilang ikaharong ang Blackwater Elite sa Araneta Coliseum.

Ang giilang darling of the crowd sa PBA, sa gihapon, mikuha sa serbisyo sa ilang paboritong import nga si Justine Brownlee.

Ang Kings gipaabot nga mopakita na usab sa ilang kalantip ug kahanas human sa ilang kapildihan sa playoff match batok sa sister-team nga Magnolia Hotshots, ang team nga mipukan usab kanila sa Governor’s Cup semifinals ug sa Philippine Cup quarterfinals.

Ning higayona, malaumon ang Ginebra nga madepensaan ang titulo nga ilang nalangkat sa niaging tuig pinaagi sa pagpukan sa San Miguel Beer.

Daghang mga elemento nga molampos ang Ginebra sa pagdepensa sa titulo. Usa niini mao ang presensiya sa ilang import nga si Brownlee diin napruybahan nga uban kanila daghang kalampusan nga ilang nakab-ot. Ang pag-abli og daog maoy ilang target batok sa Blackwater, ang team nga nagtinguha sa ilang ikaduhang daog human nila mapildi ang Meralco niadtong Dominggo.

Sa kadaugan, ang import nga si Alex Stephenson, Mike Digregorio ug Rayray Parks maoy nagkumboya aron kuliton ang 94-91 nga kadaugan sa overtime.

Ang Ginebra-Blackwater match sugdan sa alas 7 sa gabii.

Sa preliminary match sa alas 4:30 sa hapon, ang Meralco Bolts mosuway pagbangon pinaagi sa pagpakigbatok sa Columbia Dyip, ang team nga nasugamak usab og kapildihan niadtong Dominggo batok sa Alaska Aces, 111-98. (JBM)