WALA ra’y angayang ibalaka ang mga sumosunod sa Brgy. Ginebra Gin Kings gumikan kay dili ra grabe ang pagkaangol sa matag ni Japeth Aguilar nga iyang naangkon sa 102-83 nga dominasyon sa Gin Kings batok sa Alaska Aces niadtong Dominggo sa gabii sa Philippine Basketball Association (PBA) Governor’s Cup sa Araneta Coliseum.

Sa nahabiling 6:54 minutos, ang mata ni Aguilar aksidenteng natuslokan og tudlo sa iyang kauban nga si Stanley Pringle.

“It was a deep, deep poke, the one where the finger gets to the side of the eye and gets stuck in there,” matod ni Ginebra coach Tim Cone nga napatik sa PBA.PH.

“It wasn’t just a scratch. The finger really got in.”

Hinuon human sa pagsusi, nasuta nga dili ra seryuso ang nahiaguman ni Aguilar ug gilaumang makaduwa ra kini sa sunod tahas sa Gin Kings.

“Japeth’s fine, soft tissue contusion lang. He will not miss any games,” asoy ni team manager Reyboy Rodriguez.

Mao kini ang labing unang duwa sa Gin Kings sa komperensya samtang ang Aces natagak sa 0-2 nga rekord. Sa laing duwa niadtong Dominggo, gipangbuntog sa Rain or Shine Elasto Painters ang Columbian Dyip, 96-90.

Ang Elasto Painters ug Dyip pareho nang naggunit og 1-1 nga rekord. (ESL)