SEGURADONG magsadya ang Kapaskuhan sa mga atletang Pinoy nga nakalangkat og medalya sa 30th Southeast Asian Games human gianunsyo ni Presidente Rodrigo Duterte nga dugangan niya ang cash incentives nga nakasaad sa balaod sa Pilipinas.

Gibutyag ni Duterte nga modugang siya og P250,000 nga pahalipay alang sa gold medalist, P150,000 sa silver ug P100,000 sa bronze.

Ipanghatag ang maong pahalipay karong Disyembre 18 atol sa pag-courtesy call sa Team Philippines sa Malacañang isip overall champion sa matag duha ka mga tuig nga kompetisyon.

Ang maong pahalipay magsilbeng dugang sa nakasaad sa Republic Act 10699 o mas nailang National Athletes and Coaches Benefit and Incentives Act diin ang gold medal winner sa Seag makadawat og P300,000, makabulsa og P150,000 alang silver ug P60,000 alang sa bronze.

Unya atol sa sendoff party sa Team Philippines, si Philippine Olympic Committee (POC) president Abraham “Bambol’ Tolentino misaad nga iyang tugbangan ang kantidad nga ihatag sa gobiyerno sa Pilipinas ngadyo sa medal winners.

Nagpasabot kini nga ang gold winner makakuha og kinatibuk-ang P850,000, makabaton og P450 alang sa silver ug P220,000 sa bronze.

Ning pagsuwat, ang Pilipinas nakahakot na og 137 ka gold medals, 102 ka mga silver ug 107 ka mga bronze kagahapon. (ESL)