HUMAN sa pipila ka adlaw nga pagpahuway tungod sa kasaulogan sa Semana Santa, mobalik ang aksiyon sa ikatulong edisyon sa Cebu Governor’s Cup Inter-cities/municipalities basketball tournament sa duha ka managlahing dapit.

Sa Bracket A nga ipahigayon sa Mayor Exasperanza Binghay Sports Complex, ang host Balamban Ship Builders nga may 2-1 nga baraha mosuway pagsakmit sa ilang ikatulong daog batok sa Samboan (1-2) sa main game sa triple header nga sugdan sa alas 7:30 sa gabii.

Sa dili pa ang maong panag-engkuwentro, ang Medellin, nga sama sa Balamban naghupot usab og 2-1 nga record, mosuway sa katakos sa Argao (1-1) sa second game sa alas 6 sa gabii samtang sa opening match sa alas 4:30 sa hapon magtakos usab ang pulos wala pay daog nga Dumanjug (0-2) ug Danao City (0-2).

Didto sa lungsod sa Alegria, suwayan sa host ang katakos sa Tabuelan sa alas 7:30 sa gabii, ug mag-abot na usab og balik ang defending champion Talisay City Aquastars (2-0) ug Minglanilla Archangels (2-1) sa alas 6:00 sa gabii.

Ang co-leaders sa Bracket B nga Tuburan Coffee Makers (2-0) makigsangka usab sa Sogod (0-3) sa preliminary match sa sugdan sa alas 4:30 sa hapon. (JBM)