Sa labing unang higayon, nakasugat og pagpanghudlat ang University of the Visayas (UV) Green Lancers sa sayong bahin apan nakamaneho gihapon sila pagpukan sa University of Cebu (UC) Webmasters, 76-71, sa Cebu Schools Athletic Foundation Inc. (CESAFI) men’s basketball sa main game niadtong Sabado sa gabii, Nobiyembre 5, 2022, sa Cebu Coliseum.

Sa kadaugan, naharos sa Green Lancers ang tanan nilang tahas sa 1st round elimination alang sa 5-0 nga rekord.

Sukwahi sa nangagi nilang upat ka mga duwa, ang Green Lancers ni coach Gary Cortes nagsalimoang sa sayong bahin ug nabiyaan kini 11 puntos, 14-3, sa 1st quarter.

Nailog man tuod sa Green Lancers ang labaw sa halftime, 37-35, apan kanunay silang gihudlat sa Webmasters hangtod na sa katapusang gutlo.

Ang Green Lancers gipangulohan ni Albert John Sacayan pinaagi sa iyang 22 puntos, lima ka rebounds ug duha ka steals.

Ang Webmasters ni coach Kern Sesante nahagbong sa 2-3 nga rekord. / ESL

Sa laing duwa, giinat sa University of Southern Philippines Foundation (USPF) Panthers ngadto sa upat ang ilang sagunsong kadaugan pinaagi sa pagkitkit sa University of San Carlos (USC) Warriors, 77-68.

Ang Panthers ningpahugot sa ilang paggunit sa ikaduhang luna dala ang 5-1 nga rekord samtang ang Warriors natagak sa 2-4 nga baraha.