Mipakita sa ilang kagutom sa kadaogan ang Memphis Grizzlies dayong kuniskunis sa defending champion Golden State Warriors, 133-119, sa National Basketball Association (NBA) kagahapon didto sa Memphis Tennessee.

Mikamada si Jaren Jackson Jr. og 31 puntos ubanan pa sa upat ka blocks aron itimon ang Grizzlies ngadto sa 43-27 (win-loss) rekord ug ikatulo nga pwesto sa Western Conference standing.

Si Desmond Bane mitunol og 26 puntos samtang si Dillon Brooks mihatag og 18 puntos nga maoy naghatag og dakong tabang sa Grizzlies taliwala sa pagkawala sa ilang superstar nga si Ja Morant.

Wa makapahimos ang Warriors sa pag-absent ni Morant tungod kay miparat pud ang opensa sa ilang mga pambato nga players.

Si Jonathan Kuminga maoy nangulo sa Warriors sa iyahang season-high 24 puntos samtang miamot og 21 puntos si Jordan Poole.

Ang Splash Brothers nga si Stephen Curry mihimo og 16 puntos sa 5-of-15 shooting samtang si Klay Thompson adunay 14 puntos sa 6-of-17 nga tira.

Gilupig sa Grizzlies ang Warriors og pinuntosay, 29-19, sa fourth quarter.

“I think we stopped making simple plays,” padayag ni Warriors forward Draymond Green sa ilang fourth-quarter collapse. “We got back into the game just by making simple plays. Then you don’t make simple plays and make a couple of mistakes.”

Naghinamhinam na sa mga sunod nga duwa ang Grizzlies kay natapos naman ang 8-game suspension ni Morant.

Gisagpa og suspensiyon si Morant sa NBA tungod kay nagpakita kini og pistola samtang anaa sa Colorado strip club niadtong Marso 4.

Pwede na unta makaduwa si Morant karong Martes (PH time) batok sa Dallas Marvericks, apan di pa kini ipugos sa team ni Memphis head coach Taylor Jenkins.

Batbat ni Jenkins iya unang ipabalik sa kondisyon si Morant human ang duha ka semana nga wa kini makaduwa og competitive basketball.

“We’ll see when he gets back in the team environment on Monday,” matod ni Jenkins. “But our anticipation is he is at least out on Monday. We will cross the bridge (regarding Wednesday against Houston) as we get closer.”