GI-KNOCKOUT sa Sugboanong si Joe Noynay ang haponanon nga si Kosuke Saka sa ikaduhang round niadtong Sabado didto sa Edion Arena sa Osaka, Japan aron langkaton ang World Boxing Organization (WBO) Asia Pacific super featherweight title.

Sa kadaugan, si Noynay nga atoa na karon magbasehan sa Manila, mipasaka sa iyang record nga 17-2-1 nga may unom ka knockouts.

Kini maoy iyang ikalimang sunodsunod nga daog nga nakapaus-os sa baraha ni Saka, 18-5.

Sayo kaayong naglinapdosay sa ilang mga kinumo ang duha, apan ka solidong left straight ni Noynay ang nakapatumba sa haponanon.

Nakabangon ug nakasukol pa si Saka ug gani nakapa rogi usab kini ni Noynay apan sa gihapon laing kumo ang nakapatumba niini og balik.

Sa ikatulong pagkatumba ni Saka sa second round, sa gihapon nakabangon pa kini apan igo ra usab kining gikulata og maayo ni Noynay hinungdan nga giundang sa referee ang away.

Sa impresibong kadaugan, gipaabot nga mosaka ang rankings sa 23 anyos nga Noynay, lumad nga taga dakbayan sa Bogo, kinsa sa kasamtangan no. 10 sa WBO super featherweight rankings.

Si Masayuki Ito, sa Japan, maoy naghupot sa WBO super featherweight title. (EKA, JBM)