Nipadayag sa iyang suporta si Olympic champion weightlifter Hidilyn Diaz ngadto sa numero unong pole vaulter sa Pilipinas nga si EJ Obiena sa gisagubang niining mga problema sa kasamtangan.

Sa miaging mga semana, mibansiwag sa nagkadaiyang sports articles ang bikil ni Obiena sa iya mismong national sports association nga mao ang Philippine Athletic Track and Field Association (PATAFA).

Gipasanginlan si Obiena sa PATAFA og sayop nga paggamit sa gitaganang pundo alang sa iyang training.

Nahilom lang ang isyu human ningpatunga ang Philippine Sports Commission (PSC) ug mihangyo sa duha ka mga kampo nga dili na maggubat og mga pamahayag sa publiko.

Nanghinaot ang PSC nga mahatagan ra og kasulbaran ang isyu sa hapsay nga pamaagi.

Gawas ning maong kontrobersya, ang 26 anyos nga si Obiena kasamtangan sab nga gihasol sa pagkaangol sa iyang wa nga tuhod.

“Alam ko medyo mahirap, mahirap ang pinagdadaanan mo ngayon,” matod ni Diaz ngadto kang Obiena atol sa iyang pagduaw sa “Level Up” program sa Radyo Katipunan.

Si Diaz, kinsa maoy labing unang nakatunol og Olympic gold medal sa Pilipinas, nagkanayon nga pamilyar kaniya ang nasinati ni Obiena.

“Alam ko ‘yung mahirap na mag-liquidate, alam ko rin ‘yung hirap na andiyan ka sa Italy na mag-isa, malayo sa pamilya,” pasabot ni Diaz.

Nakasinati sab si Diaz og kontrobersya kaniadto kabahin sa paggunit sa pundo nga gitagana sa iyang training alang sa Tokyo Olympics diin niya nasakmit ang makasaysayong Olympic gold.

“Lagi mong iisipin na kaya mo ‘yan, ginagawa mo ito dahil alam mong kaya mo. Kaya mong manalo ng gold medal sa Olympics, at naniniwala kami sa iyo,” dugang ni Diaz.

“Nandito kami para suportahan ka. Kayang-kaya mo ‘yan.”