GAPANIKAD na ang mga lumolupyo sa Hinunangan, Southern Leyte sa duha ka makasaysayong sporting events nga mapahigayon sa ilang lungsod.

Gipangtumbok mao ang ‘Hinunangan Bay Marathon’ ug ‘Hinunangan Baroto Regatta’ nmga ipahigayon karong Hunyo 24 isip tipik sa kasaulogan sa ika-165 nga pagkakaplag sa lungsod sa Hinunangan.

Gibanabanang moabot sa tunga sa milyon ka pesos ang gitagana sa mga nagpasiugda alang ning maong duha ka mga kompetisyon.

Ang Hinunangan LGU ubos sa pagpangulo ni mayor Reynaldo Fernandez nakigtambayayong sa nila ni Southern Leyte Rep. Roger Mercado, Hilongos Mayor Jay Roble, ug Philippine Sports Commission (PSC) pinaagi ni commissioner Ramon ‘El Presidente’ Fernandez alang sa pagpahigayon ning mga kompetisyon.

Ang kanhi Customs district collector David ‘Kuya Boy’ Odilao Jr., ang utok sa pagkaporma ning mga kompetisyon, miingon nga ilang ipaneguro nga magmalampuson ang duha ka mga kalihukan.

Moabot ngadto sa P300,000 ang kinatuk-ang ganti sa duha ka mga kompetisyon.

Ang rehistrasyon nagkantidad og P500 sa 9km, P1,000 sa 21km, ug P1,500 sa full marathon.

Mahimong magparehistro sa Hinunangan Mayor’s Office, Southern Leyte Provincial Capitol, ug sa Philippine Sports Commission (PSC)-7 office sa Cebu City Sports Center.

Alang sa dugang detalye, mahimong motawag sa 0915-1429580 ug 0922-3942349) lakip na kang race director Joe Deresas sa 0933-5484858. (ESL)