TALIWALA sa dakong haw-ang sa ilang puwersa, ang Meralco Bolts nakamaneho gihapon pagbawos sa Magnolia Ang Pambansang Manok Hotshots, 91-86, kagahapon. Oktubre 8, 2021, sa Game 3 sa ilang semi-finals series sa Philippine Basketball Association (PBA) 2021 Philippine Cup sa Bacolor Pampanga.

Sa kadaugan, nakaikyas ang Bolts sa 0-3 nga biya ug napahakan nila ang labaw sa Hotshots, 2-1, sa best-of-seven series.

Ang Bolts ningkombati nga wala ang ilang pambatong sentro nga si Raymond Almazan ug Aaron Black, kinsa pulos adunay angol.

Hinuon, kuyaw nga nagkumboya ang tanang mga sakop sa Bolts aron tapakan ang haw-ang sa ilang puwersa.

Ang kadaugan gipangulohan ni Chris Newsome pinaagi sa iyang 17 puntos, nidugang og 16 puntos si Nards Pinto samtang niamot og 14 puntos si Mac Belo.

Sayong nanguryente ang opensa sa Bolts ug nakaposte sila og 47-37 nga labaw sa halftime.

Nakasikit ang Hotshots, 51-48, sa 3rd quarter apan human niini, ningbulhot na sab ang opensa sa Bolts ug ning higayuna, ninglahos na sila paingon sa surpresang kadaugan.

Sama sa naandan, ang Hotshots gipangulohan ni Paul Lee pinaagi sa iyang 18 puntos.

Puntos matag usa:

Meralco (91) - Newsome 17, Pinto 16, Belo 14, Baclao 10, Maliksi 9, Quinto 8, Caram 8, Hodge 7, Hugnatan 2.

Magnolia (86) - Lee 18, Sangalang 15, Abueva 12, Dela Rosa 10, Jalalon 9, Ahanmisi 8, Dionisio 8, Reavis 2, Barroca 2, Corpuz 2. (ESL)