GISUGAT og makutas nga overtime nga kadaugan si Los Angeles Lakers superstar LeBron James batok sa Los Angeles Clippers, 123-120, kagahapon sa National Basketball Association (NBA).

Si James, kinsa maoy pa la’y pagbalik og duwa human kini naangol niadtong adlaw sa Pasko, nagpakatap og 24 puntos ug 14 rebounds aron pangulohan ang kadaugan.

Gikan sa 118-118 nga panagtabla, si James nakapasulod og jumper aron hatagan ang Lakers og 120-118 nga labaw sa nahabiling 1:15 minutos sa overtime.

Human nakamugna og turnover ang Clippers sa return play, si Lance Stephenson nakakompleto og three-point play human siya nakadawat og assist ni James nga nakahatag sa Lakers og 123-118 nga labaw sa nahabiling 45 segundos.

Sa pagpadayon sa kombati, adunay duha ka mga higayon nga nakaitsa ang Clippers sa three-point land sa tinguha nga makapugos og ikaduhang overtime apan pulos kini nasipyat.

Si Stephenson nidugang og 20 puntos lakip na niini ang iyang career-high nga lima ka three-pointers alang sa Lakers, nidugang og 19 puntos si Brandon Ingram samtang nitampo og 14 puntos ug 13 rebounds si Rajon Rondo.

Ang Clippers gipangulohan ni Lou Williams pinaagi sa iyang 24 puntos samtang nihatag og 17 puntos si Patrick Beverley.

Ning tungatungang bahin sa season, ang Lakers nagpatong sa ikasiyam nga dapit sa Western Conference dala ang 26-25 nga rekord ug ilang gisundan ang Clippers sa ikawalong dapit nga adunay 28-23 nga baraha.

Sa laing gikaintapang duwa kagahapon, gipakgang sa Philadelphia 76ers ang host Golden State Warriors, 113-104.

Gipangulohan ni Joel Embiid pinaagi sa iyang 26 puntos ug 20 rebounds, nidugang sab og 26 puntos si Ben Simmons samtang niamot og 15 puntos si J.J. Redick.

Ang Warriors gipangulohan ni Stephen Curry pinaagi sa iyang 41 puntos samtang nihatag og 25 puntos si Kevin Durant.

Sa laing mga duwa, ningdaog ang Milwaukee Bucks batok sa Toronto Raptors, 105-92, Detriot Pistons batok Dallas Mavericks, 93-89, San Antonio Spurs batok New Brooklyn Nets, 117-114, ug Orlando Magic batok Indiana Pacers, 107-100. (AP, ESL)