Gipukan sa Utah Jazz ang kumongkumong nga Oklahoma City Thunder, 109-93, aron manuktok para mahimong overall number one seed sa National Basketball Association (NBA).

Kon modaog ang Jazz batok sa laing binhuron nga team sa NBA nga mao ang Sacramento Kings karong Mayo 18, sila ang ideklara nga adunay homecourt advantage sa tibuok playoffs.

Sama sa gipaabot, si Bojan Bogdanovic ug Jordan Clarkson maoy nitimon sa Jazz diin sila nagkumboya og 40 puntos samtang 16 puntos ug 18 ka rebounds ang giamot ni Rudy Gobert kinsa maoy front runner sa defensive player of the year.

Ang Utah Jazz katapusang nag-number one seed sa 30 ka teams sa NBA niadto pang 1998 apan gipilde sila ni Michael Jordan ug Chicago Bulls sa NBA Finals.

Base sa kasaysayan sukad niadtong 2006-07 season, kaduha ra wala makaabot sa Western Conference Finals ang nahimo nga number one seed.

Base sa mga eksperto, kon ang usa ka team sa West ang mahimo nga number one seed, ang maong team usa ka lehitimo nga molangkat sa kampyonato ug base sa gipakitang performance sa Jazz, anaa nila ang maong hiyas.

Samtang ang Philadelphia 76ers maoy nahimong number one seed sa Eastern Conference human nila gilamparo ang Orlando Magic, 122-97 atol sa ilang duwa kagahapon.

Sa playoffs sa ilang conference, ang Sixers maoy adunay homecourt advantage sa best of seven series sugod sa round one sa playoffs diin ilang makontra ang eight seed human sa play-in tournament.

Si Seth Curry nipabuto og 20 puntos, 13 puntos ug 11 rebounds ang giabag usab ni Joel Embiid samtang 13 points ug nine assists ang giamot ni Bem Simmons.

Ang Brooklyn Nets ug Milwaukee Bucks maoy nag-ilog kon si kinsa ang mahimong number two seed diin naglabaw og usa ka daog ang Nets nga gibituonan nilang Kevin Durant, Kyrie Irving ug James Harden.

Sa laing duwa, gipamatud-an sa Golden State Warriors nga makadaog sila bisan kon wala ang ang ilang superstar nga si Stephen Curry diin ilang gipatapsingan ang New Orleans Pelicans 125-122 aron makaangkon og luna sa play-in.

Gipakuratan sab sa bihagon nga Houston Rockets ang title contender nga Los Angeles Clippers 122-115 atol sa ilang duwa kagahapon. (PAC)