GIBUTYAG sa dugay na'ng agent ni basketball legend Michael Jordan nga gitanyagan sa usa ka Pinay ang iyang kliyente og $7 million o P350 million aron moduwa og golf tournament sa Pilipinas sulod lang sa usa ka adlaw.

Apan wala kini nadayon gumikan kay wala dawata ni Jordan ang maong tanyag.

Usa lang kini sa duha ka madanihong mga tanyag kaniadto nga gibalibaran ni Jordan, kinsa napatik isip ika-1,001 sa Billionaire List sa Forbes Magazine nga adunay $2.1 billion nga bahandi.

Sa WFAN radio interview kagahapon Mayo 1, 2020 nga napatik sa Spin. Ph, si David Falk miingon nga adunay appearance fee nga nagbalor og $100 million nga gibalibaran ni Jordan nga sulod lang unta sa duha ka mga oras.

“All he had to do was, other than giving his name and likeness, make a one two-hour appearance to announce the deal and he turned it down,” matod ni Falk.

Ang tanyag gikan sa Pinay nahitabo dihang naa sa Asya si Jordan lang sa pre-season game sa National Basketball Association (NBA) diin miduwa ang iyang gipanag-iya nga Charlotte Hornets. (ESL)