NAPASULOD ni Calvin Abueva ang bola pinaagi sa iyang buzzer-beater short jumper aron agakon ang Magnolia Ang Pambansang Manok Hosthots sa makutas nga kadaugan batok sa NorthPort Batang Pier, 90-89, kagahapon, Septiyembre 17, 2021 sa Philippine Basketball Association (PBA) 2021 Philippine Cup sa Don Honorio Ventura State University Gym sa Bacolor, Pampanga.

Sa kadaugan, napahugtan sa Hotshots ang ilang paggunit sa ikatulong dapit dala ang 7-3 nga rekord ug gawas niini, mihayaghayag sab ang ilang poruhan sa inilugay sa nahabiling usa ka puwesto sa top two nga nagtangag og twice-to-beat nga bintaha sa nagkaduol nga quarter-finals.

Gikan sa inbound pass gikan ni Rome dela Rosa, nadawat ni Abueva ang bola pinaagi sa pag-abag sa backscreen ni Paul Lee unya kalit lang nituyok ang The Beast aron mugnaon ang nakapadaog nga jumper.

Gipasabot ni Hotshots coach Chito Victolero, ang orihinal nilang set play niadtong higayuna gidesenyo nga alley-opp unta alang ni Abueva apan wala kini nahitabo.

“That’s a designed play, a backscreen to Calvin ala-alley-oop. And then kung wala iyon next option si Paul,” pasabot ni Victolero.

Wala pa man tuod nakaseguro og puwesto ang Hotshots sa top two apan ang labing mahinungdanon alang kanila, nakaseguro na sila’g luna sa quarter-finals.

“That was our goal today. We talked about our focus, at the same time what’s at stake in this game,” dugang ni Victolero.

Sa katapusan nilang tahas, ang Hotshots makigbatok sa San Miguel Beermen ugma diin ang kadaugan maghatag kanila og dakong poruhan nga makataak sa top two.

Sa ilang bahin, ang Batang Pier mikanaog sa ikawalong dapit bitbit ang 4-5 nga rekord.

Tungod sa ilang kapildihan, nahimutang sa delikadong sitwasyon ang Batang Pier gumikan kay tungason na ang ilang dalan paingon sa quarter-finals.

Puntos matag usa:

Magnolia (90) - Sangalang 26, Abueva 15, Lee 13, Barroca 10, Dela Rosa 10, Ahanmisi 8, Dionisio 6, Jalalon 2.

NorthPort (89) - Slaughter 21, Anthony 16, Taha 14, Malonzo 14, Bolick 10, Onwubere 4, Lanete 4, Balanza 2, Rike 2, Ferrer 2. (ESL)