GIPANGPUKAN sa David Justin ang AMICIS, 84-75, aron irehistro ang ikatulo nilang kadaugan sa samang gidaghanon nga mga duwa sa Consolacion 10th Mayor Alegado’s Cup Basketball Tournament niadtong Dominggo, Septiyemre 15 sa Consolacion Sports Complex.

Nabiyaan ang David Justin sa sayong bahin, 17-24, apan hinayhinay kining ningkamang hangtod nga ilang nakontrolar ang kombati sa 2nd half.

Ang David Justin, nga gipanag-iya ni Dennis Maglasang, gipangulohan sa kanhi magduduwa sa University of the Visayas (UV) Green Lancers nga si Chris Perolino pinaagi sa iyang 16 puntos.

Nitampo og 15 puntos si rexon Moneva alang sa David Justin samtang niamot og 14 puntos matag usa sila si Erwin Brigole ug Joseph Cabahug.

Ang AMICIS, nga natagak sa 1-1 nga rekord, gipangulohan ni Lemar Dahil pinaagi sa iyang 28 puntos. Sa Midgets Category B, nakaabante sa sunod round ang Tolotolo human nila gipanglupig ang Lanipga, 71-52.

Ning-abante sab sa sunod round ang Sacsac pinaagi sa paglampornas sa Panas, 70-48.

Sa SK Juniors Category B, gipangbuntog sa Polog ang Lanipga, 58-54, samtang gipapha sa Panas ang Tilhaong, 84-71. (JNP)