Laing batan-on ug dekalidad nga Pinoyng basketbolista ang mipirma og kontrata aron moduwa sa Japan Basketball League (JBL).

Gitumbok mao ang slamdunk artist nga si Kobe Paras, kinsa mipirma sa Niigata Albirex BB alang sa 2021-2022 season.

“I am very grateful to have this opportunity to be a part of such a great organization and basketball league,” asoy ni Paras nga napatik sa official website sa Niigata.

“I look forward to playing in the role that coach Hiraoka has envisioned for me and showcasing the love I have for this game on a professional level in front of the great Niigata boosters.”

Ang Niigata nagduwa sa B1, ang first division sa B.League sa miaging season, igo ra nakatigom og 16-38 nga rekord.

Sa umaabot nga season, ang Niigata usa sa pipila ka teams sa B.League nga adunay Pinoy nga mga magduduwa.

Ang 6’6’ nga si Paras produkto sa University of the Philippines (UP) Fighting Maroons sa University Athletic Association of the Philippines (UAAP).

Nahimong sakop sa Mythical Five si Paras sa Season 82 human siya nag-average og 17.4 puntos ug 5.7 rebounds.

Nahimo sab nga sakop si paras sa Gilas Pilipinas national team. (ESL)