NAKAPADANGAT og makuyaw nga mensahe si Giannis Antetokounmpo ug ang Greece national squad human nila gipanglampornas ang Montenegro, 85-60, niadtong Dominggo. Septiyembre 1 sa Group F sa FIBA Basketball World Cup sa China.

Si Antetokounmpo, kinsa maoy pambato sa Milwaukee Bucks ug kasamtangang MVP sa National Basketball Association (NBA), wala na kaayo gibabad sa Greece sulod sa korte gumikan kay tataw nga kontrolado nila ang Montenegro.

Sulod lang sa 16 ka mga minutos nga niduwa si Antetokuonmpo apan nakamaneho na kini pagposte’g 10 puntos.

Sa halftime pa lang, ang Greece nakamugna na og 42-16 nga labaw.

“It was a great win today,” matod ni Antetokounmpo. “A lot of guys played well. I think coach did a great job managing minutes. Everybody got some minutes. Everybody got to play.”

Ang Greece gipangulohan ni Georgios Printezis pinaagi sa iyang 16 puntos samtang nidugang og 15 puntos si Georgios Papagiannis.

“When you play for the national team, you don’t only play for yourself. You represent every single Greek person,” dugang ni Antetokounmpo.

Sa laing giatangan nga duwa, ang defending champion Team USA ningmakmak sab sa Czech Republic, 88-67, sa premiro nilang tahas sa matag upat ka mga tuig nga kompetisyon.

Gipangulohan ni Donovan Mitchell ang Team USA pinaagi sa iyang 16 puntos, niamot og 14 puntos si Harrison Barnes samtang nidugang og 13 puntos si Kemba Walker.

Si Tomas Satoransky, kinsa kanhi sakop sa Washington Wizards ug bag-uhay lang nabalhin sa Chicago Bulls, maoy nangulo sa Czech Republic pinaagi sa iyang 17 puntos. (AP, ESL)