LAING duha ka mga Pinoy fighters ang mopakita usab og aksiyon ubos sa Manny Pacquiao-Keith Thurman world title didto sa MGM Las Vegas, Nevada karong Hulyo 20 (Hulyo 21 sa Pilipinas).

Ang duha nga pulos sakop sa MP Promotions ni Manny Pacquiao mao sila si Genisis “Cobra” Libranza (18-1, 10 KO) ug Jayar “Hitman” Inson (18-2, 12 KO).

Ang 25-anyos nga Libranza makigsangka sa Amerikanhong si Carlos Maldonado (11-3, 7KOs) sa flyweight match samtang ang Davaoeno nga si Inson (18-2, 12 KO), makigsinukliay sa kumo batok sa beteranong si Mahonri Montes (35-9-1, 24 KO).

Si Libranza, taga Agusan del Sur, impresibo sa iyang pito ka sunodsunod nga kadaugan, human siya mapukan niadtong 2017 sa South African nga si Moruit Mthalane sa IBO Flyweight world title fight.

Sa iyang bahin, si Inson, kanhi WBO Asia Pacific Welterweight champion, ang napildi pinaagi sa split decision ni Jonathan Steele sa undercard sa Pacquiao-Adrien Broner fight niadtong Enero didto sa Las Vegas. (JBM)