LAING Pinoy ang nakasiguro na og luna alang sa 2020 Tokyo Olympics.

Kini human nga ang gymnast nga si Carlos Yulo maoy milabni sa ikapitong puwesto sa sa 49th FIG Artistic Gymnastics World Championships sa finals sa men’s floor exercise sa didto sa Stuttgart, Germany niadtong Lunes.

Ang pagsulod sa 19-anyos nga Yulo sa sunod Summer Games nagagumikan sa iyang gipakita sa individual all-around tungod kay ang ubang mga atleta nga mas taas pa og ranking kaniya pulos na man nakasiguro og luna sa Olympics.

Tungod niini siya maoy ikaduhang atleta sa Pilipinas, sunod ni EJ Obiena sa pole vault. Sa niaging buwan, si Obiena nakahulbot usab og lingkuranan sa Tokyo Olympics human kini mitali og qualifying mark nga 5.81 meters sa competition didto sa Chiara, Italy.

Niini, mibukad usab ang kahigayonan ni Yulo nga iyang matupngan o kaha malabwan pa ang bronze medal nga iyang nalangkat sa World Championships sa niaging tuig sa Doha, Qatar sa dihang mobalik na usab siya sa aksiyon sa finals karong Biyernes. Ang pag-qualify ni Yulo sa Olympics gikompirmar sa International Gymnastics Federation. (JBM)