Mga duwa karon

1:00 pm- USJR batok CITU (jrs)

2:30 pm- UV batok CEC (jrs)

4:00 pm- UV batok SWU (srs)

BUHION og balik sa University of the Visayas (UV) Green Lancers ug Southwestern University (SWU) Cobras ang ilang kanhi mainitong panagribal sa ilang panagtrukis karong hapon sa Cebu Schools Athletic Foundation Inc. (CESAFI) 2018 Partner’s Cup sa Cebu Coliseum.

Ang duha ka mga kampo adunay taas nga makapaukyab nga kasaysayan sa college basketball sa Sugbo gikan pa niadtong nabungkag nga Cebu Amateur Athletic Association (CAAA) apan dili ikalimod nga sa paglabay sa panahon, nausab na ang dagan sa sugilanon.

Ang Green Lancers nagpabiling labing gikahadlukan samtang ang Cobras, dili ikalimod, nagkahuyang na ang puwersa.

Hinuon wala kini nagpasabot nga klaro na ang kadaugan sa Green Lancers ning higayuna batok sa Cobras.

Gipangmakmak sa Green Lancers ang University of San Carlos (USC) Warriors, 94-67, ug University of San Jose Recoletos (USJR) Jaguars, 75-61, sa nag-una nilang duha ka mga tahas aron pag-angkon og bahin sa liderato kauban ang University of Southern Philippines Foundation (USPF) Panthers.

Sa ilang bahin, ang Cobras ningbangon gikan sa duha ka sunodsunod nga kapildihan ug namungot sa Warriors, 80-73, niadtong Huwebes aron irehistro ang labing una nilang daog sa torneyo.

Ang Cobras, nga nasubhan og kapildihan batok sa University of Cebu (UC) Webmasters, 74-86, ug Panthers, 54-79, hinayhinay na’ng nakapagawas og saktong labok ug ilaha kining napakita sa ilang kadaugan batok sa Warriors.

Tataw nga nakabaton na og dugang kadasig ang Cobras ning puntoha nga ilang gikinahanglan sa pagbangga sa lig-ong puwersa sa Green Lancers.

Sa ikaduhang duwa karon, ang UV Baby Green Lancers makigbatok sa Cebu Eastern College (CEC) Dragons alang sa high school division nga kombati.

Ang Baby Green Lancers, nga adunay 2-1 nga rekord, tataw nga inilog ning sangkaa apan dili nila angayang lugakan bisa’g gamay ang Dragons (1-2) gumikan kay gikan kini sa dakong kadaugan batok sa USC Baby Warriors, 71-68.

Magparang sab ang USJ-R Baby Jaguars (0-3) ug Cebu Institute of Technology University (CITU) Wildkittens (0-2) alang sa laing duwa sa high school division. (ESL)