PADAYON ang dominasyon ni Prince Joey Lee sa lumba sa dagan sa Sugbo dihang iyang gipatigbabawan ang men’s 12-kilometer race sa Cereb Go Green Run 2019 kagahapon sa SM City Cebu parking area.

Ning higayuna, gilupig ni Lee ang Kenyan nga si Joseph Mururi.

Si Lee, kinsa usa ka computer engineering graduate, nakataak sa finish line sulod sa 39 ka mga minutos ug 36 ka mga segundos diin iyang nabiyaan ang mas inilog nga si Mururi og 13 ka mga segundos.

Ang miangkon sa ikatulong dapit mao si Joseph Emia sa Cebu City Rider Omega Team, kinsa mitaali og oras nga 44:03.

Si Lee, 23, gikan pa sa kalampusan sa mixed relay event sa Regent Aguila Energy Drink Ironman 70.3 Philippines diin iyang kauban sa Spectrum Team sila si swimmer Micah Marie dela Serna ug biker John Mier.

Ang pagsalmot ni Lee ning maong lumba nagsilbeng tipik sa iyang preparasyon alang sa mas dakong kompetisyon sa lumba sa dagan.

Nagkanayon si Lee nga mangandam na sab siya alang sa Milo Marathon Regional Qualifiers sa Cebu sa sunod buwan.

Sa women’s category, si Lizane Abella maoy midaog sa 12K event pinaagi sa oras nga 51:42.

Nagsunod kang Abella mao sila si 2nd placer Cherry Andrin (51:43) ug Angel Estillore (1:01:23).

Sila si Kenyan Eric Chepsiror ug Asia Paraasi mao ang ningpatigbabaw sa men’s ug women’s sa 6K category.

Mitali og oras nga si 19:05 si Chepsoir samtang si Paraasi mirehistro og 24:55.

Midaog sa 3K men’s mao si Danny Digao (9:36) samtang milampos sa 3K women’s mao si Geneciel Saballa (11:33). (ESL)