HUMAN sa ilang uwahing tulo ka sunodsunod nga kadaugan, nahipunting na karon ang mga mata sa Magnolia Pambansang Manok ang paglangkat og lingkuranan alang sa finals sa PBA All Filipino Conference.

Karong gabii, ang Pambansang Manok nga nakabangon gikan sa 0-2 nga pagsugod sa best-of-seven semis, makigtigi na usab sa Rain or Shine Elasto Painters sa Game 6 nga motapon sa Ynares Gym sa Antipolo nga sugdan sa alas siete ang takna.

“We will try. The goal is to win four games to win the series. We will try to close it out Friday because we know Rain or Shine can also come back,” matod ni Magnolia coach Chito Victolero sa interview sa PBA.ph.

Kon modaog, kini mao unyay ilang ikaduhang sunodsunod nga higayon nga makataak sa finals sa nahisgutang conference.

Niadtong Miyerkules sa Cuneta Astrodome, nalimitahan sa Pambansang Manok ngadto sa dos puntos lang sulod sa katapusang tres minutos aron kuliton ang 82-74 nga kadaugan nga maoy nagbuak sa ilang panagtabla, 3-2.

Giangkon ni Beau Belga, sentro sa Rain or Shine, nga ang eksperiyensiya sa mga pag-champion sa Magnolia maoy naghatag niini og dakong bintaha.

Mao usab kini ang pangagpas ni Victolero kinsa mihulagway nga tingula gyud nila nga mahibalik ang ilang klase sa duwa nga maoy naghatod kanila ngadto sa Governor’s Cup championship.

“We just tried to be consistent playing Magnolia Hotshots basketball which is more of a defensive mindset. We just try to focus more on our defense, bring their score under 90 points,” dugang niya.

Apan bisan pa niini, si Rain or Shine coach Caloy Garcia wala mawad-i sa paglaom.

Iyang naobserbahan nga daghan kaayong mga kahigayonan nga nakaitsa ang iyang mga batos apan wala lang gyud kini mangigo.

“I still remain positive,” matod ni Garcia kinsa mipadayag nga mokaombati sila og maayo aron mahatod ngadto sa Game 7 o rubbermatch ang series. (JBM)