MAGLISOD paglangkat og world title si Filipino featherweight prospect Mark Magsayo gumikan sa kadaghang dekalidad nga mga boksidor sa iyang timbang sa nagkalainlaing suok sa kalibutan.

Mao kini ang pangagpas ni kanhi two-time world champion Gerry Peñalosa.

Si Magsayo, 26, gikan sa makapaukyab nga tenth-round knockout nga kadaugan batok kang Mexican Julio Ceja sa undercard sa Manny Pacquiao vs. Yordenis Ugas niadtong Agusto 21, 2021.

Ning awaya, namatikdang ni Peñalosa nga daghan pa’ng kinahanglan nga palambuon si Magsayo sa iyang abilidad.

Sa interbyu sa www.abs-cbnnews.com, matod ni Peñalosa nga kinahanglang palambuon ni Magsayo ang iyang lahutay ug depensa.

Si Magsayo, kinsa adunay 23-0, 16KOs nga rekord, nahimong mandatory challenger ni World Boxing Council (WBC) featherweight king American Gary Russell (31-1, 18KOs) human sa iyang kadaugan batok kang Ceja.

Sa tan-aw ni Peñalosa, dili pa andam si Magsayo nga makigbatok kang Russell ning puntoha. (ESL)