NISUGOD na sa iyang ensayo si Mark Magsayo uban sa bantugan ug Hall of Fame coach Freddie Roach didto Wild Card gym sa Los Angeles.

Didto usab ang conditioning coach nga si Justin Fortune para makab-ot sa Pilipinong boksidor ang iyang mga damgo sa maong paugnat sa kusog.

Matod ni Frances Arbie, asawa ug manager ni Magsayo, nga maayo ang gipakita sa iyang bana atol sa iyang pagbisita sa Wild Card ni Roach.

Off limits sa media ug sa ubang nanguryuso sulod sa Wild Card ang pagbisita ug pagbansaybansay ni Magsayo.

Ang 26 anyos nga Pinoy adunay 20-0 record uban sa 14 ka knockouts nipirma og kontrata sa Manny Pacquiao Promotion niadtong March pinaagi sa paningkamot ni American Boxing man Sean Gibbons.

Posibleng moaway si Magsayo karong buwan sa Septiyembre o Oktubre kini kon dili mograbe ang epekto sa Covid-19.

Si Magsayo maoy usa sa mga inilang boksidor ilawom sa MP Promorion kauban nilang John Riel Casimero, Jerwin Ancajas ug Pedro Taduran. (PAC)