LAB-AS ug init pa ang ilang panagribal sa bag-uhay lang nahuman nga National Basketball Association (NBA) Finals apan sulod sa pipila ka mga oras, hayan magkauban na sila sa Team USA.

Gipangtumbok mao sila si Devin Booker sa Suns ug sila si Jrue Holiday ug Khris Middleton sa bag-uhay lang ningkampiyon nga Milwaukee Bucks.

“Right now, we haven’t said a word to each other,” batbat ni Middleton.

Giangkon ni Middleton nga posibleng makiwawan pa sila sa usa’g usa apan sa iyang tan-aw, dili kini mahimong isyu.

“I think we’ll be fine. I’m sure we won’t be best buddies during Team USA, but we’ll be teammates, for sure,” pasabot ni Middleton.

Ang nangahisgutan gilaumang dako og matabang sa kampanya sa Team USA sa Tokyo Olympics. (AP)