MOLARGA na paingon sa Amerika sa dili pa mahuman ang buwan sa Septiyembre ning tuiga si Olympic-bound Eumir Marcial aron sugdan ang iyang training isip usa ka professional boxer.

Si Marcial maoy No.1 amateur boxer sa nasod sa wala pa kini misaka sa professional rank ning bag-uhay lang isip usa ka sakop sa MP Promotions nga gipanag-iya ni 8-division world boxing champion Manny Pacquiao.

Sa interbyu sa www.abs-cbnnews.com, gipasabot ni Marcial nga wala pa siya nasayod sa saktong detalye kon kanus-a siya makalarga sa Amerika apan nangandam na siyang daan.

Matod ni Marcial nga kinahanglan na siyang mag-training og sugod aron andam siya kon adunay oportunidad nga moabot. Gipasalig ni Marcial nga bisan mag-training isip professional boxer, tumanon niya ang iyang panumpa nga morepresentar sa Pilipinas sa 2021 Tokyo Olympics. (ESL)