MIABANTE sa Round-of-16 si Filipino boxer Eumir Marcial sa boxing men’s middleweight division boxing sa Tokyo Olympics nga wala’y singot.

Kini human nakatayming og bye sa 1st round si Marcial ug tungod niini, nagkinahanglan na lang siya og duha ka mga daog aron makaseguro og medalya sa matag upat ka mga tuig nga kompetisyon.

Si Marcial, kinsa usa ka three-time Southeast Asian gold medalist ug Asian Games bronze medalist, mosagubang sa labing una niyang tahas karong Hulyo 28, 2021.

Sa 19 ka mga Pinoyng atleta sa kompetisyon, si Marcial maoy labing gilaman nga makahatag sa labing unang Olympic gold medal alang sa Pilipinas. (ESL)