DAGHANG nasagmuyo kang Jhack Tepora dihang na-overweight kini hinungdan nga wala madayon ang labing una unta niyang away sa Amerika niadtong Enero sa undercard sa sangka nila ni Manny Pacquiao ug Adrien Broner sa Las Vegas.

Hinuon nagtuo si kanhi world champion Rodel Mayol kinsa trainer na karon nga makabawi ra si Tepora ning maong kapakyasan ug makakulit kini’g dakong pangalan sa kalibutan sa boksing sa ugma damlag.

Gipasabot ni Mayol, kinsa nagpuyo na karon sa Amerika, nga kon magiyahan lang og insakto si Tepora, hayan dako ang poruhan niini nga mahimong milyonaryo sama sa mga boxing superstar.

“Dako siya’g chance nga mahimong superstar ug millionaire kon mag-focus lang siya sa iyang boxing career,” matod ni Mayol sa interbyu sa Sun.Star Cebu, igsuong buhatan ning mantalaan. Si Tepora kasamtangang nag-training sa Amerika ubos sa paggiya ni Mayol.

Matod ni Mayol nga wala’y problema sa abilidad ni Tepora ug kinahanglan lang kining magtutok og maayo sa tanan niyang gimbuhaton isip usa ka boksidor.

Gihulagway ni Mayol ang 23 anyos nga si Tepora nga may pagka-immature pa ning puntoha sa iyang kinabuhi.

“Kinahanglan nako siyang pasabton nga ang boxing maoy iyang trabaho ug profession. Usahay mawagtang ang iyang focus, mura pa lang og duwaduwa kaniya ang boxing,” pasabot ni Mayol.

Gitataw ni Mayol nga nagkinahanglan og adviser si Tepora aron makatutok kini’g insakto sa iyang boxing career.

Matod ni Mayol nga maayo ang dagan sa training ni Tepora sa Wild Card gym ni Freddie Roach sa Los Angeles ug sa iyang tan-aw, andam na kining moaway sa sunod buwan nga dili magproblema sa timbang.

Si Tepora naggunit og impresibong 22-0, 17KOs nga rekord. (EKA, ESL)