PIPILA ka mg sports ang makabalik na og duwa sa mga dapit nga ipaubos na sa general community quarantine (GCQ) bisan pa man sa nagpadayon nga novel coronavirus (Covid-19) pandemic.

Sigon sa resolution 38 sa Inter-Agency Task Force for the Management of Emerging Infectious Disease (IATF) nga gipasar sa niaging semana, ang mga atleta sa mga mosunod nga sports mahimo nang makaduwa.

Kini mao na ang running, biking, golf, swimming, tennis, badminton, equestrian ug skateboarding.

Ang mga nahisgutan pulos mga non-contact sports, apan kinahanglan nga mosunod kini sa mga public health standards sama sa pagsul-ob og masks ug social distancing atol sa duwa. Dili usab maghuwam-huwam sa mga galamiton.

Girekomendar sa IATF nga ang Metro Manila ipaubos na sa GCQ sugod sa Hunyo. Kini magtugot na sa mga atleta sa maong sports sa pagbalik na usab sa ilang training ug duwa.

Hinuon ang ubang mga sports sama sa 5-on-5 basketball dili gihapon tugotan hangtod nga dili pa maubos sa new normal ang ilang dapit.

Kalabot sa mga Philippine Basketball Association (PBA), ang mga kadagkuan hugot nga motuki karong Hunyo 3 kalabot sa ilang plano nga pagbalik sa ilang mga duwa.

Naundang ang maong torneyo sukad pa niadtong Marso. (JBM)