MAKIGBATOK og wala’y pilde nga mga kontra ang Sugboanong mga boksidor sa premiro nilang tahas sa Ultimate Boxing Series-“Kamaong Pinoy,” usa ka boxing reality show nga gipasiugdahan sa Gerry Pens Promotions ug ESPN5.

Ang mga Sugboanong mopakita’g aksyon sa promosyon mao sila si April Jay Abne sa Wild Boxing Gym, Ian Refuela ug Rimon Rama sa Phil-Aust Stable, Lenjun Retuero sa EG Survival Boxing Camp.

Si Abne makigbatok kang Ronel Dela Cruz sa Kaamino Stable, ikaharong ni Refuela si Welben Montere, ikasangka ni Rama si Lienard Sarcon sa MP Davao samtang ikaharong ni Retuerto si Gary Tamayo sa Alchemist Multimedia. Sugdan ang kompetisyon karong adlawa sa Novaliches.

Ang finals sa flyweight ug bantamweight divisions ilakip sa undercard sa dakong promosyon sa GerryPens Promotions nga bidahan sa International Boxing Organization flyweight bout tali nila ni Carlo Peñalosa ug Mexican Maximino Flores. (EKA, ESL)