ARON mapalapdan pa ang kahibalo sa mga barangay tanod kabahin sa self-defense, ang founder sa Yaw-Yaw Ardigma Philippines nga si Master Benigno “Ekin” Caniga Jr. nagpahigayon og arnis training program niadtong Septiyembre 28, 2020.

Ang maong training gisalmutan sa mga miyembro sa Barangay Public Safety Officer (BPSO) alang sa ilang skills training program.

Buhaton kini kada Lunes alas 10:00 sa buntag ngadto sa alas 12:00 sa udto.

Asoy ni Caniga, kinsa usa ka konsehal sa barangay Day-as, Cebu City, nga ang training mao iyang nakita nga makatabang sa mga BPSO workers alang sa ilang pagpanalipod sa mga tawo sa ilang barangay.

Matod niya nga ang tumong mao ang pagserbisyo ug protekta sa ilang constituents sa Brgy. Day-as isip usa sa mga gadumala sa peace and order committee sa ilang lugar.

“Once a week ni ang among training program sa ilaha,” saysay ni Caniga kinsa ilado sa natad sa mixed martial arts dinhi sa Sugbo.

Ang maong training nakatutok sa arnis/eskrima ug handcuffing techniques.

Gibutyag ni Caniga nga naghinamhinam na siya mahimong bunga ning maong kalihukan.

Dili lang kini dugang sa kaalam sa mga tanod apan magamit kini sa panahon sa ilang pagresponde sa ilang barangay, asoy ni Caniga.

Si Caniga mao ang tag-iya sa Yaw-Yan Ardigma gym nga nahimutang sa Sanciangko Street, dakbayan sa Sugbo.

Sa pagkakaron naghuwat pa siya nga mabalik operasyon sa gym. (RSC)