Gihulagway ni Brgy. Ginebra Gin Kings coach Tim Cone nga ang ilang pagpakigparang sa Bay Area Dragons dili lang usa ka ordinaryong championship best-of-seven series sa Philippine Basketball Association (PBA) Commissioner’s Cup.

Alang ni Cone, mas espisyal kini nga series tungod kay engkuwentro kini sa PBA ug langyaw nga puwersa.

Matod ni Cone, nga dungog sa PBA ug Philippine basketball sa kinatibuk-an ang ilang protektahan batok sa Hong Kong-based nga kontra.

“It’s not just about Ginebra vs. Bay Area. It’s about the PBA against a foreign team,” matod ni Cone sa interbyu sa CNN Philippines nga napatik sa www.abs-cbnnews.com. “I think you’re playing for more than just yourself at this point.”

Ang Dragons ning-abante sa finals pinaagi sa pagpalagpot sa defending champion San Miguel Beermen, 3-1, sa ilang semi-finals series.

Mao sab kini ang gihimo sa Gin Kings ngadto sa Magnolia Chicken Timplados Hotshots sa kaugalingon nilang semi-finals series.

Ang Dragons nagtinguhang mahimong labing unang langyaw nga puwersa nga makalangkat og titulo sa PBA sukad sa Nicholas Stoodley niadtong 1980.

Matod ni Cone nga mao kini ang naghatag kanila og dugang kadasig.

“I think that really motivates the guys,” asoy ni Cone. “Since they are extra motivated to win the finals, they will play at a higher level.”

Sa panagsangka sa duha ka mga kampo sa elimination round niadtong Oktubre 9, 2022, gipanghubog sa Gin Kings ang Dragons, 111-93.

Ang ilang championship series sugdan ugma sa alas 5:00 sa hapon atol sa adlaw sa Pasko sa SM Mall of Asia Arena sa Pasay City.