SA UNANG higayon, ang Yaw-Ardigma Martial Arts Federation, Inc.-Philippines inabagan sa Lapunti Arnis de Abanico International mopahigayon og mixed martial arts promotion nga giulohan og “Cebu Fighting Championship: The Wait sa Barangay Buanoy, lungsod sa Balamban karong Disyembre 30.

Atol sa press conference niadtong Biyernes, Nobiyembre 15, sa headquarters sa Yaw-Yan sa 4th Floor sa Coast Pacific Downtown Center sa Sanciangco street, si Master Benigno “Ekin” R. Caniga Jr., mibutyag nga kini tipik lang sa ilang pagpadayon sa legasiya sa Cebu isip dapit sa Visayas diin naila ang ground and pound championship series ug Cebu Extreme Fight League.

Gawas MMA aduna usay muay thai ug ingon man stickfighting matches nga idalit ngadto sa publiko.

Miabag sa promotion si Gino Galvez, kinsa lumad usab nga taga Balamban, ug Edgar Caburnay Jr. sa Lapunti.

“Positibo mi nga kon successful ni, daghan mga lungsod ang mosunod,” matod ni Gonzales.

Siyam ka parisan ang magkombati sa kulbahinam ug madugoong panag-engkuwentro sa mixed martial arts, samtang tulo usab away ang sa muay thai.

Si Edgar Caburnay, mipadayag usab nga lima ngadto sa unom ka mga bouts ang modayan-dayan sa stick fighting.

“So tulo ni ka events in one promotion. Mora ni og 3-in-1 coffee,” pangumediya ni Ekin.

Wa pa man tuod makompirmar kon kinsa ang moaway sa main event, apan gipaniguro sa mga nagpasiugda nga tag-as og rating ang magsangka niini.

Usa sa mopakita og aksiyon mao ang undefeated nga si Lemuel Maglinte, usa ka media/sportswriter sa usa ka local nga pamantalaan.

Si Maglinte adunay 5-0, duha ang knockouts nga baraha. Posibling taga Iligan ang iyang makontra.

Sa kasaysayan, ang Cebu nakaumol na og mga MMA champions ug aduna na usay mga international contenders sama kanila ni Carry Bullos, Jimmy Yabo, Vaughn Donayre, Trestle Tan, Ruel Rosauro ug flyweight prospect Alan Albindo. (JBM)