GUMIKAN sa iyang gugma sa motorsport ug tinguha nga makahatag og panginabuhian sa mga lumolupyo sa ilang dapit ning panahon sa pandemya, si sportsman Lou Ornopia nagpatukod sa MS Motosuit Motorsports Park sa Calambua, San Remigio, Cebu.

Si Ornopia, kinsa kanhi “Sportsman of the Year” awardee sa Sportswriters Association of Cebu (SAC), mipasabot nga nagkatay na sa iyang kaugatan ang motosports hinungdan nga naningkamot siya nga maagak kining maong natad sa paugnat sa kusog taliwala ning pagkuyanap sa Covid-19.

“Kining motorsports nagdagan na gyud ni sa akong dugo,” pamahayag ni Ornopia nga gipadangat sa Cebu sports media.

Nidugang si Ornopia nga lakip sa iyang katuyoan mao ang pag-promote sa ilang lugar alang sa turismo.

“Human sa pipila ka tuig nga mipahuway ta ug dili na aktibo, dia na sab ta. Ako ning gibuhat aron sab i-promote ang kanindot sa among lugar ug ingon man paghatag og economic activity sa atong mga tawo pinaagi sa sports tourism ilabi na ning panahon sa kalisdanan,” dugang ni Ornopia, kinsa gihangop nga amahan sa motocross sa Sugbo.

Ang motorsports park adunay gilay-on nga 2.3 ka kilometros, adunay kini espisyal nga desinyo sa racetrack, nga labing una dinhi sa Sugbo.

Haom kini aron pahigayunan og motocross racing, ally driving, ug hasta mountain biking event.

Napuno sa pagdayeg kining maong gihimo ni Ornopia.

Lakip sa mga ningdayeg niini mao ang Cebu Rally Club nga gipangulohan sa ilang presidente nga si Lord Seno ug Jong King, kinsa katapusang mipakita’g aksiyon sa Otago Rally sa New Zealand niadtong 2018.

Matod ni King nga nangangha siya sa disenyo sa motorsports park nga gibasi sa international standard.

Gipahibalo ni Ornopia nga abli na sa publiko ang iyang pasiliad apan alang lang una kini sa mga magpraktis.

Nagplano si Ornopia nga mopahigayon og duha ka rallycross events inabagan sa CRC sa dili pa mahuman ang 2021.

Sa 2022, si Ornopia nagplano sab nga mopahigayon og rallycross, motocross ug mountain bike events sa tibuok tuig. (ESL)