Wala pa’y opisyal nga pagsugod sa 31st Southeast Asian Games sa Hanoi, Vietnam apan nalangkat na sa Pinay nga si Mary Francine Padios ang labing unang gold medal sa matag duha ka mga tuig nga kompetisyon.

Si Padios nipatigbabaw sa women’s seni (artistic) tunggal (single) event sa pencak silat kagahapon, Mayo 11, 2022, usa ka adlaw sa dili pa pormal nga sugdan ang kompetisyon.

Sa final, nalupig ni Padios si Indonesian Puspa Arum Sari, 9,960-9,945.

Ang Malacañang ni-congratulate dayon ni Padios sa iyang naangkon nga kalampusan.

“The Palace congratulates Mary Francine Padios for bringing pride and glory to the country by winning the first gold medal for the Philippines in Pencak Silat Women’s Seni (Artistic) Tunggal single event in Vietnam,” pamahayag ni acting presidential spokesperson Sec. Martin M. Andanar nga napatik sa www.abs-cbnnews.com.

“Congratulations. We are proud of you. Good luck to the rest of our athletes in Team Philippines. Mabuhay ang atletang Pinoy sa Hanoi.”

Ang Pilipinas, nga maoy defending overall champion, nakabira na sab og silver ug bronze medals sa ubang events.

Nakaseguro na sab og walo ka mga medalya ang Pilipinas gikan sa kickboxing team niini.

Karong adlawa ipahigayon ang pormal nga opening ceremony sa kompetisyon.