POSIBLENG masugdan ang 2020-2021 sa National Basketball Association (NBA) sa dili pa moabot ang Christmas Day.

Ang NBA Board of Governors nagtinguha nga makasugod sila karong Disyembre 22 (oras sa America) diin ang naandan nga 82 ka duwa sa regular season mahimo nang 70 o 72 ka duwa.

Kay ilang gi-target ang NBA Finals nga mahuman sa katapusan sa Hunyo nga maoy naandan sa liga base sa padayag sa kasaligang tinubdan sanglit wa pa mahingpit ang ilang desisyon.

Ang maong tinubdan kinsa niistorya sa Associated Press niingon nga wala pa mahukmi kon aduna bay mga fans nga makatan-aw live sa duwa labi nanga pabilin gihapon ang hulga sa Covid-19.

Gumikan sa shortened nga season, posible nga ikansela ang tinuig nga All Star Games para maka-prepara pa ang mga players para sa 2021 Olympics.

Aduna silay lain mga option sama sa paghuwat sa hinapos nga bahin sa season magsugod og duwa sa tinguha nga daghan pang arena ang moabli sanglit mawagtangan ang NBA og $500 milyones gikan sa gate receipt, matod pa sa source.

Mokabat ngadto sa $1.5 bilyones ang nawala nga income sa NBA gumikan sa pandemya nga niresulta sa pagkansela sa 171 ka regular season games.

Ang NBA nigasto og $200 milyones para ilang mapahigayon ang NBA bubble didto sa Walt Disney ug ang padayon nga wa pagsinabtanay sa NBA ug Chinese government hinungdan sa wala pagsalida sa duwa didto sa China.

Kon madayon ang Disyembre 22, nagpasabot kini nga mubo ra ang selebrasyon sa NBA Champ Los Angeles Lakers ug Eastern Conference king Miami Heat sanglit posibleng magsugod na ang ilang training camp karong Nobyembre. (PAC)