Giusab sa Korea Boxing Member’s Commission (KBM) gikan sa “No Contest” ngadto sa 2nd round knockout nga kadaugan ang resulta sa super bantamweight nga away nila ni Filipino Johnriel Casimero ug Japanese Ryo Akaho pabor sa gitawag og Quadro Alas.

Ang away, nga nahitabo niadtong Disyembre 3, 2022 sa Incheon, South Korea, nahimong kontrobersyal human wala na nisukol si Akaho sa rason nga nasukmagan siya ni Casimero sa likod sa ulo.

Ang Games and Amusement Board (GAB) sa Pilipinas nipadala og suwat sa KBM aron iprotesta ang resulta sa away.

Human sa ilang pagpakisusi, nasuta sa KBM nga lehitimong mga kumo ni Casimero ang nagpatay-og sa kalibutan ni Akaho hinungdan nga ilahang giusab ang resulta.

Nagkanayon ang KBM nga mismong si Akaho niangkon nga nasakitan na siyang daan sa wala pa siya nasukmagan ni Casimero sa likod sa iyang ulo.

Ning maong kalambuan, gilaumang makakuha na og rating si Casimero sa gisakaan niyang weight division.

Si Casimero, kinsa kanhi World Boxing Organization (WBO) bantamweight champion, niabante sa 32-4, 22 KOs nga rekord samtang si Akaho nius-os sa 39-3, 26KOs nga baraha.