MGA duwa karon

4:30 pm- NorthPort batok NLEX

7:00 pm- Alaska batok Phoenix

Pag-angkon sa No.1 nga puwesto maoy tinguha sa NLEX Road Warriors sa ilang pagpakigbatok sa NorthPort Batang Pier sa premirong duwa karong hapon sa Philippine Basketball Association (PBA) Governor’s Cup sa Araneta Coliseum.

Nakaseguro na man tuod silang daan og twice-to-beat nga bintaha sa quarter-finals apan labing seguro, dili kuntento ang Road Warriors niini ug tinguha nilang mohamag sa 2nd round nga adunay taas nga moral.

Ang Road Warriors mao ang labing init nga puwersa sa kasamtangan gumikan kay gikan kini sa unom ka sunodsunod nga kadaugan nga nagpaburot sa ilang rekord ngadto sa 8-1.

“We need to preserve our gains by improving our consistency and this game is a big test,” matod ni NLEX coach Yeng Guiao sa PBA.PH.

“Our focus is on execution and trying to get better for the next round.”

Sa ilang bahin, ang Batang Pier adunay 3-6 nga rekord ug nakigbahin sa Alaska Aces sa ikawalo ug katapusang luna sa quarter-finals.

Aron makasulod sila sa quarter-finals nga wala’y kahasol, kinahanglang modaog ang Batang Pier ning kombatiha ug hasta sa ilang katapusang tahas batok sa Brgy. Ginebra Gin Kings.

Sa main game, ang Alaska mosagubang sab og krusyal nga duwa batok sa Phoenix Pulse Fuel Masters.

Kon nagkinahanglan nga modaog ang Aces, mas labaw pa ang Fuel Masters nga nagkumpayot sa ika-11 nga puwesto bitbit ang 2-7 nga rekord.

Kuli na man tuod nga makasulod sila sa quarter-finals apan magpabiling buhi ang poruhan sa Phoenix kon modaog sila ning duwaa depende sa resulta sa nahabiling mga duwa. (ESL)