PADAYON ang kabangis sa hosts Milwaukee Bucks ug ilang gipanglubong og taga liog ang Oklahoma City Thunder, 133-86, kagahapon sa National Basketball Association (NBA).

Ang duha ka teams parehong ningkombati nga kuwangan og usa ka pambato apan sa sayong bahin pa lang, tataw nga mas lig-ong ang nahabiling puwersa sa Bucks pinangulohan sa kasamtangang MVP nga si Giannis Antetokounmpo.

Wala nakaduwa ang ikaduhang leading scorer sa Bucks nga si Khris Middleton aduna kini gipamating sakit sa iyang liog samtang padayon pang nagpaalim sa iyang angol (ankle) ang usa sa mga sinaligan sa Thunder nga si Danilo Gallinari.

Gipangulohan ni Antetokounmpo ang kadaugan pinaagi sa iyang 32 puntos ug 13 rebounds ug nakakuha pa kini’g dakong suporta gikan sa iyang mga kauban hinungdan nga sayo silang mingdominar.

Ang 47 puntos nga kadaugan sa Bucks maoy labing dako nilang nahimo ning maong season samtang mao sab kini ang labing dako nga kapildihan sa Thunder ning maong season.

“It feels good. It feels good seeing other guys going out there, playing hard and being up 40 points, sitting on the bench, relaxing, having fun,” matod ni Antetokounmpo.

Ang Thunder gipangulohan ni Chris Paul pinaagi sa iyang 18 puntos.

Ang Bucks, nga maoy pa lang ang nakaseguro’g luna sa playoffs, ningsaka sa 51-8 nga rekord aron pahugtan og maayo ang ilang paggunit sa overall leadership.

Sa ilang bahin, ang Thunder ningdakin-as sa 37-23 nga rekord nga ikaunom sa Western Conference. / AP, ESL