ANG pagpasaka sa mga rehistrante gikan sa 8,000 ngadto sa 9,000 maoy target karon sa mga nagpasiugda sa 7-Eleven Run Series nga ipahigayon sa Pebrero 1, 2020, (Sabado) sa Cebu Business Park.

Gawas sa dakbayan sa Sugbo, ang tinuig nga lumba sa dagan dungan usab nga ipahigayon sa dakbayan sa Davao ug sa Manila.

Mokabat ngadto sa P2 milyones nga ganti ang nakahan-ay sa kompetisyon nga sugdan sa alas 11 sa gabii, adlawng Sabado ug motapos sa Dominggo na sa kadlawon.

“We are inviting all the fitness enthusiasts and runners to come and join the fun,” matod ni Cristy Cunan sa 7-Eleven Philippines, atol sa Visayas launching kagahapon, Huwebes, Enero 9, 2020. “This will be a fun experience for them. You run, eat and bring home products from our partners and sponsors.”

Ang mga partisipante gibahin ngadto sa 42-kilometer individual, 42K relay, 32k, 21K, 21K relay, 16K, 10K, 10K buddy, 5K, 5K buddy, 3K ug 1K.

Ang 42k relay ug 21k relay maoy bag-ong nadugang karong tuiga. Ang matag relay team langkuban sa upat ka mga runners nga mao usab ang mabahin sa distansiya nga ilang daganan.

Ang top three sa tulo ka dapit nga adunay pinakakusog nga oras sa 42K, 21K ug 16K categories maoy pili-an aron molangkob sa 7-Eleven team nga mosalmot sa international race sa Asia.

Gibutyag usab sa organizers nga ila pa karon gitun-an kon unsay mga insentibo sa maong lumba. Sa niaging tuig, ang top runners gidala didto sa Thailand.

“The past three years we were in Thailand, Vietnam and Korea. Maybe will select another country this year,” padayag ni Cunan.

Gipahibawo sa organizers nga magpadayon gihapon ang ilang tanyag nga P500,000 ngadto sa runner nga makabuak sa national record nga gihuptan ni Eduardo Buenavista (2:18:00) sa men’s division ug Christabel Martes (2:38) sa women’s class.

Ang registration fee sa 42K relay mokantidad og P2,000, 42K individual P1,500, 32K P1,200, 21K relay P1,600, 21K individual P1,000, 16K P800, P10K buddy P1,200, 10K P700, 5K buddy P1,000, 5K P600, 3K P500 ug 1K P400. (RSC)